S'istudan sas fiamas
de sa mezus lumera
cando falat biddia.
Proite no mi jamas
a mi dare un'ispera,
lughe 'e sa vida mia? A it'est chi su nie
dae parizzos annos
no falat che istrina?
Pro mi gosare a tie
dia mudare pannos,
de sas bellas reina. In su tempus mezzanu
est su pastore in rughe
in mesu 'e sas peleas.
Isteddu 'e su manzanu,
torra a dare sa lughe
a sas dies intreas. |
Da su riu aundadu
si torrat indasegus
ca nd' 'eiat s'istriore.
Coro meu istimadu,
cando no so cun tegus
est un iscurigore.
Isolvet sa tristura
su sole *e su manzanu
a sa prima aparida.
Ses tues'ermosura
de su mezus beranu,
galania dechida. |
